De marzo a outubro: O Goberno Provisional

De marzo a outubro hai dous poderes: o Goberno Provisional e os Soviets. Os bolxeviques opóñense ao goberno, que adopta diversas reformas: amnistía, disolución da policía tsarista, reforma agraria, eleccións por sufraxio universal e asemblea constituínte dunha república, así como a independencia de Finlandia e Polonia. Porén, o goberno decidiu continuar na Primeira Guerra Mundial, decisión á que se opoñían os menxeviques, bolxeviques e socialistas revolucionarios.

As crises cos bolxeviques

En abril, os bolxeviques de Lenin propoñen romper co goberno, darlle o poder aos soviets e iniciar unha revolución socialista. Os menxeviques, cadetes e socialistas revolucionarios forman goberno con Kerenski e Lvov. En xullo de 1917 fracasa a ofensiva rusa na fronte e os bolxeviques organizan unha manifestación armada para tomar o poder, que foi disolta; por este motivo, Lenin fuxe e Trotski é encarcerado, tomando Kerenski o mando do goberno.

O golpe de Estado de Kornilov

En agosto, o xeneral Kornilov, xefe do exército, dá un golpe de estado para implantar unha ditadura militar. Ante isto, Kerenski alíase cos bolxeviques e o soviet de Petrogrado, que convencen aos soldados para que se opoñan aos oficiais.

A conquista do poder polos bolxeviques

Entre setembro e outubro de 1917, os bolxeviques dirixidos por Lenin e Trotski, que controlaban os soviets das cidades máis importantes, toman o poder mediante a insurrección armada. Na noite do 24 ao 25 de outubro, as tropas leais aos bolxeviques e a Garda Vermella ocupan os bancos, centrais de teléfonos e os ferrocarrís, e toman o Palacio de Inverno. En paralelo, reúnese o II Congreso dos Soviets de toda Rusia, que abandonan menxeviques e socialistas revolucionarios, permitindo que os bolxeviques se fagan co poder. Lenin preside o novo goberno denominado Consello de Comisarios do Pobo.

A creación do Estado Soviético

O Congreso dos Soviets con Lenin á fronte toma as seguintes medidas:

• Decreto sobre a paz: avoga por unha paz xusta e deixar o conflito.
• Decreto sobre a terra: expropiación de terras para os soviets de campesiños.
• Control de fábricas e minas polos soviets obreiros.
• Xornada de 8 horas.
• Dereito de autodeterminación das nacionalidades.
• Convocatoria dunha Asemblea Constituínte.

Para acabar coa oposición, establécese o control da prensa e unha policía política. Para conseguir a paz na 1ª GM, fírmase o Tratado de Brest-Litovsk en marzo de 1918, polo cal perden Estonia, Letonia, Lituania, Polonia, Xeorxia, Ucraína e Finlandia.

En novembro de 1917 celebráronse eleccións á Asemblea Constituínte, pero esta foi disolta polos bolxeviques ao non dominala. O Congreso dos Soviets asume as funcións: proclama a República Socialista Soviética Federativa Rusa, definindo o Estado como unha Ditadura do Proletariado baixo o control dun partido único: o Partido Comunista de Rusia.

A Guerra Civil (1918-1921)

A disolución da Asemblea Constituínte provocou o rexeitamento das demais forzas políticas. A oposición virá dos tsaristas, que conformarán o Exército Branco, o cal contará co apoio exterior de Reino Unido, Francia, USA e Xapón para derrocar o réxime bolxevique, iniciando a guerra civil en 1918.

Para facer fronte á oposición, Trotski creou o Exército Vermello, unha forza disciplinada que porá fin á guerra civil en 1922. Durante este período desenvólvese o comunismo de guerra: o Estado controla a economía para destinar recursos á contenda e prepárase para o socialismo suprimindo a economía privada mediante a nacionalización e militarización da industria, requisas de colleitas e represión. Todo isto leva ao fracaso económico, á gran fame de 1922 e a diversas sublevacións.

A NEP e o nacemento da URSS

Lenin, en 1921, decide cambiar o rumbo debido aos fracasos previos. Así nace a Nova Política Económica (NEP), volvendo á economía de mercado e á propiedade privada no campo e en pequenas industrias, se ben o Estado mantén o control da banca, a industria pesada e o comercio exterior. A NEP frea a fame e dá lugar á expansión e enriquecemento de parte da poboación ata 1927.

A NEP non impediu a instauración do partido único, tomándose as seguintes medidas:

1. Prohibición de divisións no seo do Partido Comunista.
2. Represión polo exército e a policía das disidencias e a oposición.
3. Recortes de dereitos civís e represión de intelectuais disidentes e da Igrexa.

En 1922 créase a URSS (Unión de Repúblicas Socialistas Soviéticas), sobre o territorio do antigo Imperio Tsarista, co Partido Comunista como único actor político.

A morte de Lenin e o inicio da loita polo poder

Coa morte de Lenin en 1924, empezan as disputas polo poder entre Trotski e Stalin. Este último controla o aparello do partido e conta co apoio de sectores bolxeviques, a pesar de que Lenin desconfiaba del. Entre 1924 e 1927 houbo disputas entre ambos con dúas visións diferentes da economía e a política. Finalmente, Stalin triunfa en 1927, expulsando a Trotski e aos seus seguidores do Partido Comunista. Trotski foi expulsado da URSS en 1929 e asasinado en México en 1940.

A URSS baixo a ditadura de Stalin

A ditadura de Stalin caracterízase por:

1. Culto á personalidade, poder absoluto e represión de calquera disidencia.
2. En 1936 promúlgase unha nova Constitución que legaliza a ditadura.
3. Formación da nomenklatura: funcionarios do PCUS con grandes privilexios.
4. Práctica do terror para o control da sociedade mediante purgas e o sistema de Gulags.
5. Estatalización da economía dende 1928, totalmente controlada polo Estado:

• Colectivización do campo: creación de granxas colectivas (kolkhozes e sovkhozes).
• Plans Quinquenais (1929–1941): priorizan a industria pesada para acadar a independencia económica, tecnolóxica e militar, en detrimento do consumo da poboación civil.